"တကယ်ဒီမိုကရေစီလိုလားတဲ့သူတိုင်းမှာ ဒီမိုကရေစီနဲ့ မကိုက်ညီတဲ့ ဖွဲ့စည်းပုံအခြေခံဥပဒေထဲက ပုဒ်မတွေကို ပြင်ဆင်ဖို့က ကိုယ့်တာဝန်ပဲလို့ မှတ်ယူရပါမယ်။ နောက်ပြီးတော့ နိုင်ငံတော်သမ္မတကြီးက ဖွဲ့စည်းပုံအခြေခံဥပဒေ ညီလာခံရဲ့ဥက္ကဋ္ဌ မဟုတ်ဘူးလား" ဟု ဖွဲ့စည်းပုံအခြေခံဥပဒေကို ပြင်ဆင်ရန် လွှတ်တော်ကိုယ်စားလှယ်များပေါ်တွင်သာ မူတည်ကြောင်း သမ္မတကြီး၏ ပြောကြားချက်နှင့်ပတ်သက်၍ မေးမြန်းရာတွင် ဒေါ်အောင်ဆန်းစုကြည်က ပြန်လည်ဖြေကြားခဲ့ပါသည်။
ဖွဲ့စည်းပုံအခြေခံဥပဒေကို ပြင်ဆင်ရေးအတွက် NLD ပါတီအနေဖြင့် မည်သည့်အချိန်တွင် အဆိုတင် သွင်းမည်နည်းဟု Eleven Media Group ၏ မေးမြန်းမှုကို ဒေါ်အောင်ဆန်းစုကြည်က "ဖွဲ့စည်းပုံအခြေခံ ဥပဒေကို ပြင်ဆင်ဖို့ဆိုတာကတော့ ကိုယ့်မှာဘယ်လောက်အထိ အောင်မြင်နိုင်မလဲဆိုတဲ့ အခြေအနေကို ကြည့်ပြီးလုပ်ရမှာ ဖြစ်ပါတယ်။ ဘယ်ကစမလဲဆိုတာလည်း ဆုံးဖြတ်ရမယ်" ဟု ဖြေကြားခဲ့ပါသည်။
ထို့အတူ ဖွဲ့စည်းပုံအခြေခံ ဥပဒေတွင်ပါဝင်သော သမ္မတလောင်း အရည်အချင်းများနှင့် ပတ်သက်၍ ဒေါ်အောင်ဆန်းစုကြည်က "အဲဒီ ဥပဒေကို အမေတို့သဘောမတူဘူး။ အဲဒါကြောင့် တကယ်ပဲမျှမျှတတနဲ့ ပြိုင်ချင်တယ်ဆိုရင် ဒီဥပဒေကို မျှတအောင်လုပ်ရမယ်" ဟု ပြောကြားခဲ့သည်။
"နောက်သက်တမ်းမှာ အရွေးချယ်ခံချင်တဲ့ မည်သူမဆို အားလုံးကနေ မျှမျှတတ အခြေခံပေါ်ကနေ ရွေးချယ်နိုင်အောင်လို့ ကြိုးစားပေးစေချင်တယ်။ အကုန်ပြင်ရမှာပဲ။ ဒီဖွဲ့စည်းပုံ အခြေခံဥပဒေကြီးက တရားမျှတမှုမှ မရှိတာ။ တရားမမျှတတဲ့ ဥပဒေအရတော့ ခေါင်းဆောင်လုပ်ချင်စိတ် မရှိသင့်ဘူးလို့ ဒီလိုပဲမြင် တယ်" ဟု သတင်းထောက်များ၏ မေးမြန်းချက်များကို ပြန်လည်ဖြေကြားခဲ့ပါသည်။
ဒေါ်အောင်ဆန်းစုကြည်က ပြည်သူလူထုကသာ လိုလားပါက သမ္မတလုပ်ရဲသည့် သတ္တိရှိသည်ဟု အောက်တိုဘာလ ၈ ရက်နေ့က ပြုလုပ်ခဲ့သော အမေရိကန်ခရီးစဉ် သတင်းစာရှင်းလင်းပွဲတွင် ပြောကြားခဲ့သည်။
ဖွဲ့စည်းပုံအခြေခံဥပဒေ ပြင်ဆင်ရေးသည် မိမိ၏သဘောထားတစ်ရပ်တည်းနှင့် ပြင်ရန်မဖြစ်နိုင်ကြောင်း၊ ဖွဲ့စည်းပုံအခြေခံဥပဒေတွင် ပြင်ဆင်ရန် အခွင့်အလမ်းပေးထားပြီးဖြစ်ကြောင်း၊ ထို့ကြောင့် ဖွဲ့စည်းပုံအခြေ ခံဥပဒေကိုပြင်ရေး၊ မပြင်ရေးသည် လွှတ်တော်ထဲ၌ရှိနေသော လွှတ်တော်ကိုယ်စားလှယ်များ၏ ဆန္ဒအ ပေါ်မှာပဲ မူတည်ကြောင်း နိုင်ငံတော်သမ္မတ ဦးသိန်းစိန်က အောက်တိုဘာလ ၂၁ ရက်နေ့က ပြုလုပ်သော မီဒီယာများနှင့် တွေ့ဆုံပွဲတွင် ပြောကြားခဲ့သည်။
ဖွဲ့စည်းပုံအခြေခံဥပဒေ ၂၀၀၈ အခန်း ၁၂ ဖွဲ့စည်းပုံ အခြေခံဥပဒေ ပြင်ဆင်ခြင်း ပုဒ်မ ၄၃၅ တွင် ဖွဲ့စည်း ပုံ အခြေခံဥပဒေကိုပြင်ဆင်ရန် ဥပဒေမူကြမ်းကို ပြည်ထောင်စုလွှတ်တော်ရှိ လွှတ်တော်ကိုယ်စားလှယ် စုစုပေါင်း၏ ၂၀ ရာခိုင်နှုန်းက တင်ပြလာလျှင် အဆိုပါပြင်ဆင်ချက် ဥပဒေကြမ်းကို ပြည်ထောင်စုလွှတ်တော်က လက်ခံဆွေးနွေးရမည်ဟု ဖော်ပြပါရှိသည်။
လက်ရှိကျင်းပလျက်ရှိသော ပြည်ထောင်စုလွှတ်တော်တွင် တပ်မတော်သား လွှတ်တော်ကိုယ်စားလှယ် ၂၅ ရာခိုင်နှုန်း ပါဝင်လျက်ရှိသည်။
No comments:
Post a Comment